O PC non arrinca:
que che está dicindo

Cando non se acende nin unha luz nin xira ningún ventilador, o equipo non está a recibir corrente ou a fonte de alimentación non a está entregando. Antes de pensar nunha avaría, descarta o sinxelo: proba o enchufe con outro aparello, quita a regleta do medio, revisa que o cable estea ben encaixado polos dous extremos e, nun sobremesa, que o interruptor da parte traseira da fonte estea en posición de acendido. Nun portátil, conecta o cargador e fíxate en se se acende o seu piloto; se a batería estaba completamente descargada, deixa que cargue un anaco antes de volver probar. Se con todo iso segue sen dar sinais, o máis probable é a fonte, o cargador, o botón ou a placa base, e aí xa non hai comprobación caseira segura: abrir unha fonte de alimentación non é unha opción, porque os seus condensadores poden conservar carga mesmo desenchufada.

Que o equipo recibe corrente, pero algo non chega a completar o arranque ou a imaxe non chega ao monitor. O primeiro é descartar a parte máis parva, que é tamén das máis frecuentes: monitor apagado, entrada de vídeo equivocada no menú do monitor, cable solto ou, en sobremesas con tarxeta gráfica, o cable conectado á saída da placa base en lugar de á da tarxeta. Probar con outro monitor, unha tele ou un cable distinto aclárao en minutos. Se a pantalla segue negra con todo iso descartado, as sospeitosas habituais son a memoria, a tarxeta gráfica, a fonte ou a placa base. Ten en conta tamén que algúns equipos recentes tardan bastante máis do normal no primeiro arranque tras cambiar a memoria ou actualizar a BIOS, porque axustan a memoria antes de mostrar imaxe: dálle un par de minutos antes de apagalo á forza.

Son o propio equipo dicíndoche que peza fallou na comprobación inicial que fai antes de cargar o sistema. O problema é que o código non é universal: cada fabricante de placa base ou de BIOS usa as súas propias combinacións de pitidos longos e curtos, e mesmo dentro dunha mesma marca cambian entre xeracións. Por iso unha táboa xenérica atopada en internet pode levarte á peza equivocada. O útil é anotar o patrón exacto, cantos pitidos, longos ou curtos, se se repiten, e buscalo no manual da túa placa ou do teu modelo de equipo. Moitas placas modernas non levan altofalante e no seu lugar teñen uns pequenos pilotos rotulados que quedan acendidos na fase que falla, e algúns portátiles fan pestanexar o piloto de acendido ou o de maiúsculas cun patrón concreto. Sexa cal sexa a forma, apúntao: afórranos tempo de diagnóstico.

Non necesariamente, pero é unha das posibilidades e a que máis importa descartar. Que apareza o logo do fabricante significa que a parte básica do equipo funciona: o fallo chega despois, ao tentar cargar o sistema. As causas habituais son unha actualización que se cortou a medias, ficheiros de arranque danados, un pendrive ou disco externo conectado que o equipo tenta usar para arrincar, un sobrequecemento ou, efectivamente, un disco que comeza a fallar. O primeiro é desconectar todo o que non sexa imprescindible e ler con calma se aparece algunha mensaxe antes do reinicio; unha foto co móbil axuda. Se oes clics, chirridos ou o disco arrincando e parándose, deixa de intentalo nese mesmo momento: cada reinicio en bucle é un arranque máis dun disco que pode estar danado, e iso é xusto o que complica recuperar o que hai dentro.

Deixa que remate un ciclo completo sen interrompelo, porque ás veces resolve o problema el só. Se volve ao mesmo punto, Windows ofrece un menú de opcións avanzadas con reparación de inicio, restaurar sistema ou desinstalar a última actualización, e nun equipo cunha copia de seguridade recente probar esas opcións é razoable. O que non convén facer ás cegas é escoller «Restablecer este PC», porque segundo a opción que marques pode quitar os teus ficheiros, nin lanzar comprobacións de disco que escriben sobre el para «arranxalo». Se o bucle se debe a un disco que está fallando, esas ferramentas tano traballando durante moito tempo e poden modificar xusto a zona onde estaban os teus documentos. Así que a pregunta clave antes de tocar nada é se tes copia do importante. Se non a tes, apaga o equipo e tráeo: primeiro asegúrase o contido, despois repárase o sistema.

Nun ordenador de sobremesa, si, se te sentes cómodo abrindo a caixa; é unha das comprobacións que máis a miúdo resolve unha pantalla negra con ventiladores xirando. Apaga, desenchufa o cable de corrente, toca unha parte metálica sen pintar da caixa para descargar a electricidade estática, abre as pestanas do módulo, sácao e volve inserilo dereito e con firmeza ata que as pestanas pechen soas. Colle os módulos polos bordos, sen tocar os contactos dourados, e non forces nada: se non entra, está xirado. Nun portátil é outra historia: en moitos modelos a memoria vai soldada á placa e noutros hai que desmontar bastante para chegar, con clips e cables planos fráxiles polo camiño. Aí non compensa o risco. E se non che apetece abrir o sobremesa tampouco pasa nada: é unha comprobación de cinco minutos no taller.

Pode arranxar un sistema danado, pero é a última opción, non a primeira, e nunca sen ter antes os teus datos a salvo. Reinstalar implica escribir moitos gigas no mesmo disco onde están os teus documentos, e segundo como se faga pode borralos directamente ou sobrescribir a zona onde estaban. Ademais, se a causa real era un disco que comeza a fallar, a reinstalación irá mal a metade do proceso ou o sistema novo durará pouco, e terás gastado horas de funcionamento dese disco no peor momento posible. A orde correcta é a contraria: primeiro comprobar o estado do disco e copiar o que importa, despois decidir se o sistema ten arranxo ou convén instalalo de cero. Se nese punto xa tes unha copia comprobada e o disco está san, reinstalar é unha solución limpa e perfectamente válida; se non a tes, é o paso que máis veces converte un susto nunha perda.

Depende de que peza fallase e de como estea o resto do equipo, así que non se pode responder antes do diagnóstico. Un cable, un cargador, unha fonte de alimentación ou un disco son reparacións acoutadas que adoitan devolverlle a vida útil a un equipo polo demais san. Unha placa base nun portátil de varios anos, ou varias pezas á vez nun equipo que xa non recibe actualizacións do sistema, é outra conversa, e convén comparar antes de decidir. O que si é independente desa decisión son os teus datos: aínda que o equipo non mereza a reparación, o que hai no seu disco case sempre se pode sacar e pasar ao ordenador novo se o disco está ben. Por iso o primeiro é saber que fallou de verdade. Con iso diante dicímosche canto custaría cada opción, e se a conclusión é que non compensa arranxalo, dicímoscho igual.